鲍鱼花螺扇鸡煲+招牌咖喱鸡煲蟹!
要食得豪，唔一定要食蚝，食“鲍鱼鸡煲”更加豪！（哈哈）
寻晚有“老细”请客，车我哋去番禺“古堤雅轩”劲食“鲍鱼扇花螺一品扇鸡煲”。￥228一煲，里面有半斤花螺，半斤扇鸡，同埋五只拳头咁大嘅大连鲍。鲍鱼大只不在话下，重点係够、干、净！自己都买过鲍鱼返屋企煮，知道要刷得干净好有难度。问部长点解只只鲍鱼都可以咁“白雪雪”，部长话係将肉同壳拆开，分别刷洗，要花唔少精力同时间。真係五星级都冇佢咁干净。
重口味嘅“鲍鱼焖鸡”就见得多嘞，呢个偏清淡口味嘅“鲍鱼花螺一品扇鸡煲”感觉别有一番风味。鲍鱼、鸡，加上花螺嘅搭配，如果要用一个字嚟形容，大家都会估到係咩字：鲜！
（鲍鱼大只，卖相够杀食，小伙伴们都争住影相...）
（对比一下小伙伴嘅拳头...1:1）
阿“老细”係番禺地胆。佢介绍话“古堤雅轩”最出名嘅係“咖喱”，每位台都必点。我哋当然要比机会“老细”豪一豪佢，点埋呢个￥258嘅“招牌咖喱鸡煲蟹”！
睇相你未必睇得出，但个煲口直径真係唔细咖，只大肉蟹好大只。扇鸡新鲜食得出，肉质有口感。搭配鱿鱼，带出鲜味。重点係特制嘅“咖喱汁”，微辣，实质上又唔觉得辣，带D柠檬鲜香，真係好好味！
然后呢味係“鲜虫草蒸野生石燕”，价钱段只计。有人听见係“野味”就流晒口水。“石燕”係一种雀鸟，同乳鸽差唔多大只。加上“鲜虫草花”（同我哋平时食开嘅干虫草花有D唔同）、黑木耳嘅搭配，好鲜味。
再嚟个健康餸：飘香五谷粗粮煲。呢种养生菜肴Celia大爱呀！南瓜、薏米、粟米都超中意。
然后到卖相出彩嘅“避风塘苏格拉鳕鱼”。其实唔单只係卖相咁简单，鳕鱼口感都好好。肉质唔会松散，鱼皮部分都炸到酥脆。
仲有靓汤：土茯苓灵芝炖草龟。小伙伴话“好耐未试过睇住TVB饮啖汤”，可见靓汤水对广东人嚟讲何其重要啊！
饭后甜品係“冰皮雪榴莲”。中间夹心係榴莲肉，一啖咬开就闻到香味啦！
店名：古堤雅轩
地址：番禺市桥二桥南堤东路12-16号铺（具体位置可在大众点评搜到）
人均：￥100+
