实力派抵食海鲜小炒:富来美食

點擊標題下方澳門生活網，關注我們的微信平台！

        點擊右上角把這條微信分享給你朋友吧！

喺澳門食海鮮小炒嘅選擇都算幾多，但到底邊間又平又抵又正又夠人情味，小編第一時間諗起富來美食！佢地開業廿五載，可謂街坊老店，雖然地點並非旺區或太多人流，但總係客似雲來，經常爆滿，儲埋好多街坊熟客。亦有唔少港人專程要食富來嘅椒鹽粟米同海鮮，藝人谷德超都係常客。縱使多年來客源穩定都堅持無開分 店，全因事頭婆每日親力親為打點一切，盡力控制好食物品質，不求賺到盆滿砵滿，只求客人食得開心滿足。

椒鹽粟米$40

全澳首創嘅椒鹽粟米！店主嚴選靚粟米，炒煮過程絕無添加糖份，但食落除咗十分香口嘅椒鹽味外，亦有啖啖甜味，完全嚟自粟米本身的甜味。如果入貨時搵唔到符合標準嘅靚貨，店主寧願停售，所以嚟得食到必定水準十足！富來嘅各款小炒都好味兼抵食(如：豉椒鵝腸$45、啫啫雞煲$48、豆腐火腩煲$48、水煮田雞$60)。

金銀蒜蒸聖子王(時價)

蒜茸用金銀蒜，即生蒜同熟蒜放埋一起蒸，寧舍香口惹味，送飯一流。蒸嘅時間控制得宜，肉質鮮嫩肥美，呢碟聖子王小編光顧當日賣緊$248/斤，如果食開海鮮就知道貨真價實。

幫襯過富來嘅客人都知道老闆娘相當好客又老實，海鮮嚴選貨源品種，生猛新鮮，唔會出現呃稱或偷龍轉鳳。重點係價錢亦非常公道，零售價只比來貨價貴一啲啲，利 潤唔多，有時甚至蝕住做。自從政府實施強制性公眾假期「三工」(僱主要為當日上班嘅僱員給予三倍工資)，公眾假期喺澳門出街搵食認真艱難。好似清明、重 陽、勞動節、國慶等，大部分食肆都會喺當日加一加二，甚至加30%都有唔少，但此度喺節日都堅持原價唔收附加費，只有年初一、二、三酌量加收15%。

避風塘炒蟹(時價)

採用菲律賓深海泥蟹，肉質特別鮮甜，避風塘亦做得十分香口惹味，絕對零味精，食完唔會出現口乾情況。(當日時價為$298/斤)

鱆紅魚剌身(時價)

趙師傅刀功了得，得到唔少客人讚賞。

剌身類是好多客人嘅必點項目，鱆紅、海鱲、墨魚都非常受歡迎！趙師傅專門負責處理剌身，魚片幾乎切到紙咁薄。

上圖嘅鱆紅魚剌身約為四分一條魚，當日時價$128/斤，十分抵食！唔洗怕腥又夠魚鮮味，一片接一片小編真係食到停唔到口，難怪事頭婆話曾有客人四個人嚟一共Order咗兩條都全部KO哂，兩條魚嘅話即係有八盆如上圖嘅份量！魚頭仲可以叫店員將佢滾湯或薑蔥爆等方式處理，實行一魚多食唔浪費！

食海鮮小炒配啤酒就固之然爽，但想健康啲，呢度有唔少足料涼茶選擇：雞骨草、夏枯草、竹蔗茅根、川貝雪梨蜜、酸梅汁同豆漿。

餐廳分為兩個相鄰舖位，白鴿巢佳景附近嘅土地廟旁邊斜路行落去，舖頭就喺右手邊。

富來美食

地址：沙梨頭沙梨頭街22號地舖

電話：2831-1517

營業時間：星期一至日: 11:00-21:00

（來源：內容來自開飯喇）

澳門生活網

第一時間推送澳門熱點新聞

關注生活瑣事，了解社會動態

微信號：imacaolife